Нэхэмжлэл гардуулах

• Шүүхийн мэдэгдэх хуудас ба нэхэмжлэлийн хувь гардаж авсан эсэхийг тодорхойлох нь шүүх дараа дараагийн ажиллагаагаа хийх, хэрэг хянан шийдвэрлэх ажиллагаа хэрхэн үргэлжлэхийг тодорхойлох ач холбогдолтой тул хууль зүйн өндөр ач холбогдолтой ойлголт юм.
• Шүүх нэхэмжлэлийн хувийг хариуцагчид гардуулахдаа хариуцагчийн хаягаар түүнд холбогдуулан нэхэмжлэл шүүхэд ирснийг мэдэгдэж, гардан авахыг сануулан мэдэгдэх хуудас илгээх замаар хийж гүйцэтгэнэ. Ингэхдээ нэхэмжлэл гардуулах цахим системийг шүүхээс ашиглах боломж бүрдсэн бол дараах арга хэрэгслийг ашиглаж болно. Үүнд:

Хуульд заасан хариуцагчид мэдэгдэх хуудсыг хүргүүлэхийн хамт нэхэмжлэлийн хувийг хэргийн оролцогчийн эрх, үүргийн тайлбарын хамт илгээх

Хариуцагч нь иргэн бол түүнтэй төрийн байгууллагаас харилцах төрийн мэдээллийн нэгдсэн системийн иргэний бүртгэлийн дугаар бүхий үндэсний цахим шуудангийн хаягаар мэдэгдэх хуудас, нэхэмжлэлийн хувь, эрх үүргийн тайлбарыг илгээх

Хариуцагч нь хуулийн этгээд бол түүнийг итгэмжлэлгүй төлөөлөх эрх бүхий этгээдийн бүртгэлийн дугаар бүхий үндэсний цахим шуудангийн хаягаар мэдэгдэх хуудас, нэхэмжлэлийн хувь, эрх үүргийн тайлбарыг илгээх

Өмгөөлөгчийн Монголын Өмгөөлөгчдийн холбооны цахим системд бүртгүүлж холбогдсон цахим шуудангийн хаягаар мэдэгдэх хуудсыг илгээх

• Мэдэгдэх хуудас, нэхэмжлэлийн хувь, эрх, үүргийн тайлбарыг баталгаат шуудангаар илгээсэн, эсхүл шүүхийн ажилтнаар биечлэн хүргүүлснийг хариуцагч хүлээн авсан бол ийнхүү хүлээн авсан өдрөөр нэхэмжлэлийг гардаж авсан гэж үзнэ. /ИХШХШтХ-ийн 753.2/

Хариуцагчийн хаяг тодруулах

Дараах тохиолдолд шүүх санаачилгаараа хаяг тодруулах ажиллагааг хийж, мэдэгдэх хуудас, нэхэмжлэлийг гардуулна. Үүнд:

1. Мэдэгдэх хуудсыг баталгаат шуудангаар, эсхүл шүүхийн ажилтнаар биечлэн хүргүүлсэн боловч хариуцагч тухайн хаягт оршин суудаггүй, үйл ажиллагаа явуулдаггүй бол хариуцагч иргэний болон хуулийн этгээдийн бүртгэлийн дугаар, эсхүл регистрийн дугаарыг мэдээлсэн нэхэмжлэлийн тухайд албан ёсны хаягийг улсын бүртгэлийн байгууллагаас шүүх тодруулна. /ИХШХШтХ-ийн 754.1/

2. Улсын бүртгэлийн байгууллагаас тодруулж ирүүлсэн хаягаар шүүхийн мэдэгдэх хуудсыг хүргүүлсэн боловч хариуцагч тухайн хаягт оршин суудаггүй, үйл ажиллагаа явуулдаггүй бол иргэн, хуулийн этгээдтэй төрийн байгууллагаас харилцах төрийн мэдээллийн нэгдсэн системийн иргэний, эсхүл хуулийн этгээдийн хувьд түүнийг итгэмжлэлгүй төлөөлөх эрх бүхий этгээдийн бүртгэлийн дугаар бүхий үндэсний цахим шуудангийн хаягаар , өмгөөлөгчийн Монголын Өмгөөлөгчдийн холбооны цахим системд бүртгүүлж холбогдсон цахим шуудангийн хаягаар мэдэгдэх хуудсыг илгээнэ. /ИХШХШтХ-ийн 754.2/